Pikiala pillugu
Pikialami nukiit pitsaasut ineriartortitserusussuserlu atorlugit sullitatsinnut suleqatigisatsinnullu sunniuteqarluarusuppugut. Unammillernartunik suussusersiuinitsigut, paasiniaaqqissaarnitsigut, suliniutinik aqutsinitsigut, nalilersuinitsigut, sammisanillu aqutsinitsigut tamanna ilaatigut qulakkeersinnaavarput. Taamaattumik suliffeqarfiit siunissamut eqqarsaatigilluakkanik aalajangiisinnaanissaannut toqqammavilersuiniarneranni suleqataalluarsinnaavugut.
Tunngavik
Pikialami sulinerput tunuliaquttatsinnik misilittakkatsinnillu sorlaqarpoq. Avatangiisitsinni pissutsit piviusuusut aallaavigalugit sulivugut. Kalaallit Nunaanni nunarsuarmilu.Tamanna aallaavigalugu siunissamut isigaluta sulivugut.
Pikialami misilittakkavut piginnaasavullu aallaavigalugit suliniutit isumassarsiaanerannit inerneqarluartumik naammassineqarnissaannik qulakkeerinninnissamut piukkunnaateqarluarpugut. Ilusilersorluakkamik suleriaaseqarpugut, suliniutinillu mikinernik annernillu piviusunngortitsisinnaanermik misilittagaqarluarluta.
Pikialap piginnittui aqutsisuilu suleqatigiiupput nukittuut, oqartussat suliffeqarfiutaanni, suliffeqarfinni annerni, suliffeqarfinni oqartussanut attuumassuteqanngitsuni inuiaqatigiinnilu sulinikut. Kalaaliusutut Kalaallit Nunaanni inuiaqatigiit ilisimasaqarfigilluarlugillu paasisimasaqarfigaavut. Aamma immitsinnut nunarsuarmioqataasutut isigaagut, tamannalu pissutigalugu suliffeqarfinnut Kalaallit Nunaanniittunut, suliniutinullu Kalaallit Nunannut nunarsuarmullu tunngasunut, Pikiala suleqatissatsialaavoq.
Naleqartitat
Innarligassaannginneq
Oqaatigisatta iliuuserisatsinnut, suliatsinnilu inernerusunut naapertuunnissaat uatsinnut pingaaruteqarluarpoq. Suna anguniarnerlugu, qanoq isumaqarnerluta, sunalu tunniussinnaanerlugu ersarissartuarusupparput. Tassunga atatillugu suliatta pitsaanerpaaffissaaniitsinnissaa pingaaruteqarluinnarpoq, taamatuttaaq inuiaqatigiinni inuuffigisatsinni iluaqutaanissarput takorluugaralutigu.
Alapernaanneq
Alapernaattuunissaq uatsinnut pingaaruteqarpoq, sorpassuartsigut inuiaqatigiinni allatigullu allanngorarneq piujuarmat. Avatangiisivut isiginnittaatsillu allat alapernaaffigaagut. Alapernaanneq eqqarsaatersuuteqarnerlu aqqutigalugit ineriartortuarnerput upperisarilluinnarparput. Suleqatigiinneq pitsaasoq uatsinnut tassaavoq ineriartorfiusoq, alapernaannermik tatigeqatigiinnermillu toqqammaveqartoq.
Suliarisinnaasagut makkuupput:
- Periusissianik ineriartortitsineq
- Atuutilersitsineq
- Suliniutinik aqutsineq
- Attaveqaqatigiinneq peqataatitsinerlu
- Misissueqqissaarneq nalilersuinerlu
- Isumassarsianik najoqqutassianillu ineriartortitsineq
- Nunatsinni inuiaqatigiit pillugit saqqummiineq
- Coaching
lisarititsineq
Maliina Abelsen
Maliina UNICEF-imi suliniutinut aqutsisuunikuuvoq Air Greenlandimilu Niuernermut pisortaanikuulluni, tassani tunisassiorneq, nittarsaassineq, sullissineq mittarfimmilu sulisut akisussaaffiginikuullugit. 2013-imiit 2016 tikillugu Maliina Arctic Winter Games 2016-imi pisortaavoq. 2009-miit 2013 tikillugu Inatsisartuni ilaasortaavoq, piffissallu taassuma iluani Aningaasaqarnermut Naalakkersuisuullunilu Isumaginninnermut Naalakkersuisuulluni.
Maliina Genèvemi, Naalagaaffiit Peqatigiit inuit pisinnaatitaaffiisa kommissoriatianni taavalu Nuummi Nunanut Allanut Pisortaqarfimmi sulinikuuvoq.
Ukiut ingerlanerini siulersuisuni sulineq ineriartorfigilluarpaa, ullumikkullu Royal Greenland A/S-ip siulersuisuini siulittaasuuvoq, Grønlandsbankip siulersuisuini ilaasortaavoq Grønlandsbankillu Inuussutissarsiornermut Aningaasaateqarfiani siulittaasumut tullersortaalluni. Siornatigut aamma Visit Greenlandip siulersuisuini siulittaasuunikuullunilu Tele- Greenlandip siulersuisuini siulittaasup tulliunikuuvoq.
Maliina cand.scient.soc-imik ilinniagaqarpoq (Sociologi), Australiamiillu Policy and Applied Social Sciencemi mastergradeqarluni. Taakkua saniatigut nunarsuaq tamakkerlugu atorsinnaasaminik coachitut yogamik ilitsersuisutut, mindfulnessimik ilitsersuisutut aamma suliniutinut aqutsisutut ilinniagaqarpoq, 2023-milu Tjekkiamiut Kalaallit Nunaanni konsuuliattut toqqarneqarluni.
Arnakkuluk Jo Kleist
Arnakkuluk ukiuni kingullerni tallimani, 2018-imiit 2023-mut, Kalaallit Nunaata kulturikkut illorsuani, Katuami, pisortaavoq, suliffeqarfillu coronap nalaani piffissami unamminartumi aqulluarlugu. Taanna sioqqullugu Tele-Postimi (maanna Tusassiusoq) attaveqaqatigiinnermi pisortaavoq.
2014-imiit 2016 tikillugu Arctic Winter Games 2016-imi pisortamut tullersortaavoq, tassani attaveqaqatigiinneq, kulturikkut suliaqarneq kajumissutsiminnillu sulisumik sulisoqarneq akisussaaffigalugit.
Tassani sulilinnginnermini Kommuneqarfik Sermersuumi Attaveqaqatigiinnermut Kultuurimullu immikkoortortami aqutsisuuvoq.
Arnakkuluk Roskilde Universitetimit attaveqaqatigiiinnermut aamma kultuurit oqaatsillu naapinnerat pillugit kandidatitut ilinniagaqarpoq.
Arnakkuluk Kalaallit Nunaanni eqqumiitsuliornermut aningaasaateqarfimmi siulittaasup tulliuvoq, inuiaqatigiinnilu akuulluarneq pingartippaa soorlu ilaatigut kajumissutsikkut sulinermigut kultuurikkullu pikialaartitsinerni peqataajuarnermigut. Taassuma saniatigut inuiaqatigiinni attaveqaatai siammasissupilussuupput.
Pinngortitaq Arnakkuluup ulluinnarni eqqissisimaarfigalugulu nukinik nutaanik aallerfigisarpaa.