Suliarisinnaasagut
Periusissianik ineriartortitsineq
Suliffeqarfiit periusissiorniarneranni siunnersortitutit suleqataasinnaavugut. Suliffeqarfiit avataaniit isigalugit periusissiorneranni tapersersorsinnaavagut suliaq aqqutissiorlugu. Takorluukkamiit anguniakkat erseqqarissut angunissaannut aqqutissiuisinnaavugut allannguinnissat tigussaasut piviusorsiuortullu ukkataralugit. Pikialami pingaartipparput periusissiorneq piviusorsiorluni ingerlanneqassasoq suliffeqarfiup iluani pissutsit kiisalu suliffeqarfiup avataanit pissutsit tunngavigineqarlutik. Periusissiat sananeqareeraangata minnerunngitsumik pingaaruteqarpoq sulinermi sakkusatut atoruminartuussasut nikeriaqqinnissamullu aqqutissiuisuullutik.
Atuutilersitsineq
Suliffeqarfinni amerlanerpaani isumassarsiat ulluinnarni sulinermi atuutilersillugit piviusunngortitsinissaat ajornartittarpaat. Angorusutat piviusunngortinniarneranni erseqqissumik tigussaasunngortitsinissaq kikkullu qanoq iliuuseqassanersut eqqarsaatikkut ajornappasinngikkaluartoq pilersaarusiorniarluguli piviusunngortinniarlugulu ajornakusoorsinnaavoq. Arlaatigulli suliffeqarfimmi allannguerusukkaanni ineriartortitserusukkaannilu isumaliuutigiinnarnagu sulinermi suleriaaseq allanngortinneqartariaqarpoq. Suliffeqarfiit allannguutinik atuutilersitsiniarlutik sulineranni Pikialami siunnersuisutut suleqataasinnaavugut.
Suliniutinik aqutsineq
Pikialami suliniutinik assigiinngiiartunik aqutsinermik misilittagaqarluarpugut. Misilittakkagut piginnaasagullu tunngavigalugit suliniutit aallartitsinnagit nalilersorsinnaavagut, suliniutit pilersaarusiorluarsinnaavagut, suliniutit inerneqarluartumik piviusunngortissinnaavagut kiisalu suliniutit naammassineqareeraangata nalilersuisinnaalluta. Suliffeqarfiit assigiinngitsut, soorlu pisortanit ingerlanneqartut namminersortunillu pigineqartut, kiisalu inuiaqatigiinni inuit allat suliniutit aqqutigalugit suleqatigiisinnissaat misilittagaqarfigilluarparput.
Attaveqaqatigiinneq peqataatitsinerlu
Suliffeqarfinni tamani attaveqaqatigiinneq pingaaruteqarpoq. Tamanna suliffeqarfiup iluani suliffeqarfiullu avatangiisillu attaveqaqatigiinnerannut atuuppoq. Suliffeqarfiit iluatitsilluarnissaanut attaveqaqatigiilluarneq aamma aqqutaasinnaavoq. Attaveqaqatigiineq pitsaasoq ingerlanniaraanni tunngaviusumik nalunngilluarneqartariaqarpoq kina attaveqaqatiginerlugu, attaveqaqatigiinnermi suna anguniagaanersoq qanorlu attaveqaqatigiinneq ingerlanneqassanersoq aamma ilisimaneqartariaqarluni. Pikialami suliffeqarfinni attaveqaqatigiinneq pillugu ilisimasaqarluarpugut tamannalu tunngavigalugu suliffeqarfiit attaveqaqatigiinnikkut sulineranni siunnersorsinnaallugit pilersaarusiornerannilu suleqataalluta. Arnakkuluk Jo Kleist attaveqaqatigiinneq pillugu kandidatitut ilinniagaqarpoq suliffeqarfinnilu assigiinngitsuni aqutsisutut pisortatullu attaveqaqatigiinneq akisussaaffiginikuullugu.
Ilaanni attaveqaqatigiinneq naliginnaasoq naammanneq ajorpoq suliffeqarfimmullu arlaatigut soqutigisaqartut allalluunniit annertunerusumik peqataatinnissai pisariaqartarluni taamaasillunimi aalajangiinerit pingaaruteqartut pitsaanerulertarput. Pikialami taamatut peqataatsinermik ingerlatsineq misilittagaqarfigivarput suliffeqarfiillu taamatut peqataatserusuttut sullissinnaavagut.
Misissueqqissaarneq nalilersuinerlu
Suliffeqarfinni assigiinngitsuni aaqqiissuteqapallannissaq sammineqarnerusarpoq misissueqqissaarneq suliarineqaqqaarani. Aaqqinniagarli allanngorniagarluunniit sunaanera paasissagaanni misissueqqissaarneq pisariaqarpoq paasereeraannilu aatsaat aaqqiissut pitsaasoq nassaarineqarsinnaalluni. Pikialami ilinnikkagut misilittakkagullu tunngavigalugit isiginnittariaatsit periuutsillu assigiinngitsut atorlugit ajornartorsiutinik aaqqitassanilluunniit misissueqqissaarneq suliarisinnaavagut. Misissuinerit itisiliinerusut misissuinerillu amerlanerpaanik apersuinissamut tunngasut ingerlassinnaavagut. Peqqutit assigiinngitsut tunngavigalugit misissueqqissaarneq pisariaqartinneqarsinnaavoq aaqqiissutit pitsaanerpaat nassaariniarlugit misissueqqissaarnerullu ingerlannissaa Pikialami suleqataaffigisinnaavarput.
Suliniut sunaluunniit ingerlanneqarnikuugaangat naammassineqareersimagaangallu nalilersuinermi paasineqartarpoq suliniummi anguniakkat anguneqarsimanersut ilisimasallu nutaat suut pissarsiarineqarsimanersut. Suliniutip ingerlanneqareernerani nalilersuinerup qanoq naleqartiginera ajoraluartumik ilaanni puigorneqartarpoq nalilersuinissarluuniit pinngitsoortinneqarluni ilaatigut ulapinneq peqqutigalugu. Pikialami suliniummik nalilersuineq ingerlassinnaavarput taamaasillutalu suliniutip angusimasai ilisimasallu pilersinneqarsimasut nassaareriarlugit paasinartumik saqqummiussinaavagut.
Isumassarsianik najoqqutassianillu ineriartortitsineq
Najoqqutassiamik isumassarsiamilluunniit ineriartortitserusukkaanni Pikialami siunnersuisut eqqartueqatigineqarsinnaapput. Suliffeqarfinni assigiinngitsuni sulisimanigut suliniutinillu aqutsisimanigut tunngavigalugit siunnersuilluarsinnaavugut. Isumassarsiat ineriartortillugit pilersaarutit allisinneqarnissaat pisariaqartinneqarpat tamanna peqataaffigisinnaavarput aammali isumassarsiaq misissorsinnaavarput piviusunngortinneqarsinnaanersorlu nalilersorlugu. Najoqqutassianik ineriartortitsinermi inuit assigiinngitsut peqataatinneqartariaqartut peqataatinnissai aamma misilittagaqarfigilluarparput.
Nunatsinni inuiaqatigiit pillugit saqqummiineq
Kalaallit Nunaat nunallu issittut nunarsuatsinni nunanit allanit soqutigineqarlualernikuupput uagullu kalaallit nammineq nunarput pillugu saqqummertarnissarput pisariaqarluinnarpoq. Pikialami inuunitsinni misigisimasagut sulinikkullu misilittakkagut tunngavigalugit nunarput inuiaqatigiillu kalaallit pillugit saqqummiisinnaavugut. Tusarnaartunut assigiinngitsunut saqqummiineq misilittagaqarfigilluarparput paasissutissallu assigiinngitsut paasiuminartumik saqqummiussinnaallugit. Minnerunngitsumik nunarput pillugu oqaluttuarnissaq saqqummiinisarlu soqutigisarivarput taamaaliornermilu nammineq aallavipput tunngaviusarluni.
Coaching
Maliina Abelsen coachitut ilinniagaqarsimavoq ukiorpassuarnilu aqutsisutut sulinermini coachitut ilinniarsimanini atorsimallugu. Maliina isumaqatigiisuteqarfigalugu coachitut oqaloqatigineqarsinnaavoq. Oqaloqatigiinnerup ingerlanerani tatigeqatigiinneq toqqisisimanerlu tunngaviusarlutik. Maliina yogamik mindfulnessimillu ilitsersuisutut ilinniarsimavoq taakkulu tunngavigalugit suliffeqarfimmi atugarissaarneq sammisinnaallugit.